pubblicato il  15 Maggio 2017

 

"Se vinne" di Giuseppe Salvatore in dialetto di Casole Bruzio (CS)

 

Tante vote m’ha vistu cca davanti,

a’ chiss’angulu ammucciatu ‘e paise,

puru si mo’ ce càpitu ogne tantu

a caminare ppe’ ‘sse vecchie scise.

 

Queta e sula ti nne sta appartata,

senza cchiu nessunu chi te usa,

ccu’ ‘na carta: “se vinne ‘ssa casa”,

‘e tiempu attaccata alla porta chiusa.

 

Quannu passu me fiermu a te guardare,

arricordanname ‘a vita c’amu vissutu,

finu a mme ‘ncantare a penzare

e ‘na lacrima si nne scinne muta.

 

Né mo' né tannu si stata ‘e ra mija,

ma cumu tu saji, sutta 'ssu sumpuortu,

simu crisciuti tutti ppe’ ‘sta vija,

‘ntuornu a tijo e allu vicinu uortu.

 

Famme guardare, serutu a ‘ssu scalune,

due ‘u tiempu 'e passatu a jocare,

‘a lamparina chi te penne ddu’ spicune

e ‘na vota, chistu pizzu, servija ppe’ allurare.

 

Famme rare ccu’ llu core na carizza

a 'ssa cannaletta due acqua n’é chjiovuta,

alla finerra, staccata ‘ra frontizza,

ppe’ ogni ceramilu chi 'nterra te carutu.

 

Sicuramente te conzanu cchiù bella,

appena 'ncunu te vene ar accattare:

te pittanu, cangiannute a ‘nna giuvinella,

roppu c’u viecchiu su juti a te cacciare.

 

‘U tiempu se piglie tuttu lu passatu,

ma ‘u modernu nun è sempre scuru:

sanizze rariche, ccu tijo, haju chjiantatu,

bone stipate ‘ntra nu tiraturu.

 

<< indietro

inizio pagina